Þínar fréttir, þín skoðun

Landssamtök atvinnuafurða hækka viðmiðunarverð um 25%

Höfundur: Sighvatur Björgvinsson -
Flokkur: Atvinnumál, Samfélagið, Stjórnmál, Viðskipti  

Rætt við Lamba Rútsson, formann

„Við í Landssamtökum atvinnuafurða förum ekki fram á neitt annað en réttmæta lagfæringu á okkar afurðaverði og skilning á okkar stöðu“, segir Lambi Rútsson, formaður henna nýstofnuðu landssamtaka, sem í gær samþykktu 25% hækkun á viðmiðunarverði á afurðum sínum. „Eins og öllum má vera ljóst þá er vinnan okkar afurð og öll aðföng til framleiðslunnar hverju nafni sem þau nefnast – hvort heldur sem er húsnæðiskostnaður, kostnaður við fæðuöflun, flutningskostnaður, orkukostnaður eða annar nauðsynlegur kostnaður aðfanga – hefur hækkað þetta frá 30% og upp í 60% á nokkrum misserum. Eru þá ótaldar miklar skatta- og gjaldahækkanir, sem á okkur hafa verið lagðar og hækka allan kostnað við framleiðslu á okkar afurð, vinnunni, upp úr öllu valdi. Ákvörðun okkar er því aðeins lítilsháttar leiðrétting sem þó hvergi nærri nægir til þess að bæta allar kostnaðarhækkanir, sem á okkur hafa verið lagðar.“

Þá bendir Lambi á, að verð á íslenskri vinnuafurð hafi hækkað mjög á erlendum mörkuðum að undanförnu. Nefnir hann Noreg sem dæmi. „Þar er verð á afurðum okkar tvöfalt hærra en á Íslandi,“ segir Lambi.  „Það er því eðlilegt að afurðaverðið til okkar hér heima hækki til samræmis við það. Er það raunar alveg óhjákvæmilegt ef ekki á svo að fara að skortur verði á okkar afurðum hér heima ef miklu betra verð fæst til langframa á mörkuðum í nágrannalöndunum. Mikill útflutningur hefur t.d. orðið á vinnuafurðum heilbrigðisstéttanna og haldi svo áfram stefnir í læknalandauðn á Íslandi.“

Lambi telur ekki sjálfgefið að þó afurðaverð á íslensku vinnuframlagi hækki um allt að 25% þá hækki verðið til innlenndra neytenda að sama skapi. „Ég vil ekkert fullyrða um það en bendi á, að ýmis fyrirtæki sem nýta okkar afurðir fá nú mjög góð verð fyrir framleiðslu sína erlendis; t.d. álverksmiðjur, framleiðendur lambakjöts,  útgerðir og fiskvinnslur. Engin ástæða er fyrir þessi fyrirtæki að hækka verð á framleiðslu sinni á innanlandsmarkaði með svo sterka stöðu og sama gildir efalaust um fleiri.“

Á stofnfundi sínum ítrekuðu Landsamtök atvinnuafurða eindregna andstöðu  við aðild Íslands að Evrópusambandinu. „Allir Íslendingar vita og viðurkenna, að engin útlend vinnuafurð er jafn heilnæm, vönduð og góð og vinna Íslendinga,“ sagði Lambi. „Íslensk vinnuafurð er einstök og á heimsmælikvarða eins og margítrekað hefur verið ekki bara af okkur sjálfum heldur ekki síður frændum okkar Norðmönnum eins og lesa má í fjölmörgum viðtölum við Íslendinga, sem þangað hafa farið og ekki snúið heim aftur. Við krefjumst því þess að horfið verði frá öllum vangaveltum um aðild að Evrópusambandinu en erum hins vegar tilbúin til viðræðna um gerð tvíhliða samnings og munum fallast sambærilegar lausnir og þegar hafa verið samþykktar um sérstöðu íslenskra sauðfjár-, nauta-, svína-, hænsna- og sveppaafurða, þ.e. að heimilaður verði tiltekinn lágur tollkvóti á innflutning vinnuaflsafurða frá Evrópusambandslöndunum sem síðan verði boðin upp á vegum landbúnaðarráðuneytisins – t.d. 10 tonn af pólskri vinnuaflsafurð, 50 kg af írskri, 5 tonn af franskri o.s.frv. Hæstbjóðandi hljóti. Landssamtökin áskilja sér að sjálfsögðu rétt til þess að bjóða  m.a. til þess að koma í veg fyrir undirboð á erlendum vinnuaflsafurðum á markaðnum hér, sem ella gæti verið hætta á.“

Að lokum sagði Lambi að með slíkum úrræðum væri komið í veg fyrir sjúkdómahættu í íslenska atvinnustofninum sem væri mjög viðkvæmur vegna sérstöðu sinnar. „Með slíkum aðhaldsaðgerðum væri lítil hætta t.d. á kólígerlasýkingum í íslenska stofninum eins og þeirri sem farið hefur eins og logi um akur meðal fólks í mörgum Evrópulöndum í sumar og hefur orðið mörgum að aldurtila. Jafnframt því myndi örugglega draga úr hættu á alvarlegum smitsjúkdómum eins og fuglaflensu, mislingum og slæmu kvefi, sem er algengt í evrópsku vinnuafli; sérstaklega á haustin.“